Hosenrugg oder Hosenruck isch e Teeu vo dr Gmein Wuppenou u das isch öppe 7 Kilomeeter im Nordoschte vo Wil. Daas schteit im aute geograafische Lexikoon vo dr Schwiz. Aber deert schteit leider niid, wohäär dä Oortsname chunt. Im Schwizerdütsche Wörterbuech isch dr Name Hoseruck oder Hoserugg unger em Schtichwort Rugg mit dr Bedütig «Rücken». Dr zwöit Teeu vom Name meint auso «Rügge».

Dr Nameteeu Hosen- meint nid «Hose», er meint «Haas».

Im eutischte Beleeg vo däm Oort vo 1359 heisst er Hasrugg. Das cha men im Artiku «Hosenruck» im Hischtoorische Lexikoon vo dr Schwiz nacheläsen unger www.hls.ch. Hosenrugg oder Hosenruck meinti auso uf Schriftdütsch übersetzt «Hasenrücken». Das lüüchtet eerschtens ii, wius e ganz e Huuffen Oorts- u Fluurnäme git, wo mit Hase- aaföö. U zwöitens lüüchtets ii, wiu Hoseruck a dr Süüdsite vom Nolle ligt uf emene Rügge, wo früecher offebaar Hase gschpiiut hei.